17:45
Мајә манги 25-дә Толыши јолә патриот, нәһәнгә ичтимои хадим Каһин Әбилови (Мирзәлизодә) 52 синнәдә дыроз кәшә нәхошәтику бә рәһмәт шеку 1 со

Мајә манги 25-дә Толыши јолә патриот, нәһәнгә ичтимои хадим Каһин Әбилови (Мирзәлизодә) 52 синнәдә дыроз кәшә нәхошәтику бә рәһмәт шеку 1 сор давардедә.

К. Әбилов ыштә кыртә умри вејни бә ыштә хәлги һәср кардәше, хысусән 2000-минә соронәдә Толышә миллијә һәрәкати озавзијејәдә ијән ростбемонәдә әһәмијәтинә хыдмәтоныш быә. Бы вахтәдә чәј де шәһидә алим Фәхрәддин Әбосзодә ичтимои һәмкоәти бино бедә. 2002-минә сорәдә Санкт-Петербургәдә әвон чы мәрһум Әвәз Садыхзодә иминә "Толышә зывони граматикә" китоби бә тырки чапышон карде. 2002-2004-минә соронәдә де К. Әбилови ијән ҹо толышә фәал ијән активистон дастәки Ф. Әбосзодә редактә кардә "Толыш" номәдә гәзетән һәмонә шәһәрәдә бешедәбе. 2003-минә сорәдә толышә ичтимои хадимон (К. Әбиловән чәвон дыләдә) Толышә мәдәнијәти ростбемонә умумрусијә фонди (2005-минә сорику - Толышә мәдәнијәти ростбемонә умумдынјо фонди) сохтышоне. К. Әбилов Фонди һәмсәдронәдә гыләј бе. 2000-минә соронәдә ым Фонд һәгиги мәноәдә бә толышә мәдәнијәти ијән ичтимои жимони флагманон гыләј пегарде. 2003-минә сорәдә Фонди чы З. Мәдожи шерон китоби, 2004-минә сорәдә - толышә нәғылон китоби, чы Әшрәфи Сәрхани "Боблә до" номәдә һекајон мәҹмуә, чы Әли Насири "Баһанд, толышә былбыл" номәдә толышә зывонәдә иминә китоби, 2005-минә сорәдә чы Хилгәти толышә ғәзәлон китоби, 2006-2008-минә соронәдә чы Ф. Әбосзодә иминә урусә-толышә луғәти (ды ҹилдәдә) чапыш карде. 2005-минә соронәдә Фонди чы И. Мәммәдови иминә толышә мусигијә албомыш, 2008-минә сорәдә исә - чы Т. Ағајеви (Мәфтуни) толышә мејһанә албомыш бекарде. 2004 ијән 2005-минә соронәдә Фонди бә толышә зывонәдә доври иминә бәдии филмон (Т. Ағајеви ијән Н. Ағајеви "Дыләсут" ијән "Дыво") бекарде дастәкыш карде. 2004-минә сорәдә Фонди чы Ә. Насири китоби тәгдимоти, 2005-минә сорәдә - чы И. Мәммәдови албоми тәгдимоти, 2011-минә сорәдә - "Кадус" ансамбли чыхыши Минскәдә тәшкилыш карде. 2003-минә сорәдә толышә хадимон "ТолышПресс" номәдә информасијә агентәти сохтышоне. 2008-минә сорику та 2020-минә сор Каһин Әбилов чы ым агентәти сәрредактор бе. Ым сајт Толышә миллијә һәрәкати ән воҹибә мәтбуат органонәдә гыләј бе. 2010-минә сорәдә толышә рушинфикон (де К. Әбилови ивырәдә) Толышыстони тәдғығ кардеро Толышә Миллијә Академијәшон сохте. Де Толышә мәдәнијәти ростбемонә умумдынјо фонди ивырәдә ТМА чы Ф. Әбосзодә Толышә-тыркә луғәтыш (2010-минә сор), Урусә-толышә луғәтыш (2011-минә сор) ијән гыләјән Толышә-тыркә луғәтыш (2011-минә сор) чап карде. 2011-минә сорәдә ТМА чы Ф. Әбосзодә Толышә ханәти тарыхи барәдә "Толыши тәшкил ныбыә сәбәсожәти" номәдә китобыш бекарде. Һәмонә сорәдә чы "ТМА Хәбон" номәдә елми журнал нәшр кардејән тәшкил бе. 2012-минә сорәдә ТМА чы Ф. Әбосзодә тожә Урусә-толышә ијән Ингилисә-толышә луғәтон нәшр кардыше. 2019-минә сорәдә ТМА чы Ф. Әбосзодә ијән Ә. Садыхзодә "Толышә зывони граматикә" бекардыше (толышијәдә). К. Әбилов толышә милләти һәггон мыдофијә кардејәдән фәал иштирок кардедәбе. 2007-2009-минә соронәдә Озобојҹондә һәбс кардә быә шәһид Новрузәли Мәммәдови һәггон, 2012-2016-минә соронәдә Озобојҹонәдә һәбс кардә быә Һилал Мәммәдови һәггон ијән 2018-2020 соронәдә Русијә ијән Озобојҹонәдә һәбс кардә быә шәһид Фәхрәддин Әбосзодә һәггон мыдофијә кардә әсос ичтимои хадимонәдә гыләј быә. Ыштә мәгалон ијән чыхышонәдә әв һежо чы толышон мәдәни ијән сијоси һәггон тәләб кардедәбе. Каһин Әбилов (Мирзәлизодә) дештә жимони, дештә јолә әмәлон ијән коон ыштә номи бә Толышыстони тарых де ғызылә һәрфон нывыштыше.

Хыдо әј гәни-гәни рәһмәт быкә, мәканыш вәјшт быбу!

Әләкрәм Һуммәтзодә, Толышә-Мығонә Мухтарә Республикә Президент

Category: TMH Xəbon | Views: 57 | Added by: tmmrtalish | Tags: tolishstan.com | Rating: 0.0/0
Total comments: 0
Подписка: 1 Код *: